07.05.2019-cu il tarixdə Naxçıvan Tibb Kollecində “8 may-Beynəlxalq Talassemiya Günü” ilə əlaqədar olaraq elmi-praktik konfrans keçirilmiş, konfransda həmin kollecin  müəllim -tələbə  heyəti iştirak etmişdir.

Naxçıvan Tibb Kollecinin direktoru Sona Məmmədova konfransı giriş sözü ilə açaraq qeyd etmişdir ki, talassemiya xəstəliyinə düçar olan xəstələrə dövlət səviyyəsində qayğı göstərilir. "Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında" qanun qəbul edilmiş, Azərbaycan Respublikası Nazirlər Kabinetinin 2006-cı il 18 yanvar tarixli 15 nömrəli Qərarı ilə "Hemofiliya və talassemiya irsi qan xəstəlikləri üzrə Dövlət Proqramı" təsdiq edilmişdir.

Bu proqrama əsasən isə ilk növbədə hemofiliya və talassemiya xəstələrinin həyat tərzinin yaxşılaşdırılması və ömürlərinin uzadılması qarşıya məqsəd qoyulub. Eləcə də proqramda hemofiliya və talassemiyanın fəsadlarından əmələ gələn əlilliyin və ölüm hallarının azaldılması, bu fəsadların profilaktikasının təşkili və xəstə uşaqların doğulmasının qarşısının alınması sisteminin yaradılması yer alıb.

Talassemiyanın müalicə və profilaktikası üzrə Tədbirlər Proqramı təsdiq edilib. Bu Tədbirlər Proqramı talassemiyalı xəstələr üçün tibbi yardımın daha da təkmilləşdirilməsinə və xəstə uşaqların doğulmasının qarşısının alınmasına yönəlib. Naxçıvan Muxtar Respublikasında, Naxçıvan Muxtar Respublika Xəstəxanasının Hematologiya şöbəsində talassemiyadan əziyyət çəkən xəstələrin müalicəsi üçün işlər görülüb, lazımı avadanlıqlar alınıb. Talassemiyalı xəstələrin müalicəsi gündüz stasionarı şəraitində həyata keçirilir. Gündüz stasionarlarında əsasən xəstələrə qan köçürülür. Xəstələrin digər müalicəsi əsasən evdə, həkimlərin təyinatı üzrə aparılır. Həmin şöbə ən yeni avadanlıqlarla təmin edilib. Xəstəxananın tərkibində Qan Bankı xəstələr üçün donor qanının tədarükü ilə məşğuldur.  

Daha sonra Naxçıvan Tibb Kollecinin müəllimi Arzu Kərimli, talassemiya xəstəliyi haqqında slaydlarla ətraflı məlumat vermişdir.

26.04.2019-cu ildə Naxçıvan Tibb Kollecində  Yeni Azərbaycan Partiyası Naxçıvan Şəhər Təşkilatı Qadınlar Şurası   Akademik Zərifə Əliyevanın 96-cı ildönümünə həsr olunmuş konfrans keçirildi.  

Konfransı  giriş sözü ilə açan  Yeni Azərbaycan Partiyası Naxçıvan Şəhər Təşkilatı Qadınlar Şurasının sədri, Naxçıvan Muxtar Respublikası Ali Məclisinin deputatı, Naxçıvan Muxtar Respublikasının Əməkdar həkimi Yazgül Rzayeva  “Akademik Zərifə xanım Əliyevanın həyatı və yaradıcılığı” haqqında geniş nitq söyləmişdir. Bildirmişdir ki, “İdeal qadın, mehriban ana, sadiq həyat yoldaşı olan və bəşəriyyətə öz sənəti  və  nurlu əməlləri ilə işıqlı bir gələcək bəxş edən Zərifə xanım Əliyevanın anadan olmasının 96-ci il dönümü ilə əlaqədar olaraq toplaşdıqlarını və bu zərif insanın həyatından və elmi uğurlarından geniş söhbət açmışdır.

Yeni Azərbaycan Partiyası  Naxçıvan Şəhər Təşkilatı Tibb Kolleci ərazi ilk təşkilatının sədri Leyla Vəliyeva “Böyük ana haqqında düşüncələr “ mövzusunda çıxış etmişdir. O çıxışında qeyd etmişdir ki, Zərifə xanım Əliyevanın timsalında ilk öncə ideal qadın və əsl Azərbaycan xanımı obrazı canlanır. Hesab edirəm k, i Zərifə xanım Əliyevanın keçdiyi həyat yolu bizim gənc xanımlarımızın həyatının formalaşması baxımından parlaq nümunədir.

Əziz Əliyeva  adına Republika  Uşaq xəstəxanasının oftalmoloqu Kəmalə Əliyeva “ Akademik Zərifə xanım Əliyeva Elmi və ictimai fəaliyyəti ” mövzusunda çıxış etdi. Bildirdi ki, Zərifə xanım Əliyevanın zəngin elmi irsi oftalmologiyanın müxtəlif elmi sahələri üzrə apardığı tədqiqatlar, qazandığı naliyyətlər, yaratdığı fundamental əsərlər Azərbaycan Tibb  elminin parlaq bir səhifəsini təşkil edir. Onun Azərbaycanın Elmlər Akademiyasının həqiqi üzvü seçilməsi onun elmi xidmətlərinin vətənə qanuni təsdiqi olunmuşdur. Onun əsərlərində “Göz yaşının axmasınınn fiziologiyası” ,” Gözün və görmə siniri yolunun yaşla əlaqədar dəyişiklikləri” , “Gözün hidrodinamik sisteminin anatomik – fizioloji təbiəti” və.s  bəhs olunur.

Naxçıvan Dövlət Universiteti tibb fakültəsinin V kurs tələbəsi Bənövşə Qasımova  “Akademik Zərifə xanım Əliyevanın Pedaqoji Fəaliyyəti” haqqında çıxş etdi. Çıxışında Zərifə xanımın Azərbaycan Dövlət Həkimləri Təkmilləşdirmə İnstitunun göz xəstəlikləri kafedrasının professoru vəzifəsinə seçilməsi ilə pedaqoji fəaliyyətinin genişləndirilməsi, həmçinin praktik səhiyyə üçün kadr hazırlığına  və həkimlərin ixtisasının artırılmasına ürəkdən səy göstərməsindən danışdı.

Naxçıvan Tibb Kollecində “Naxçıvan Muxtar Respublikasında ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinin vəziyyəti və innovasiyaların dəstəklənməsi barədə” aprelin 22-də Naxçıvan Muxtar Respublikası Ali Məclisində keçirilmiş müşavirədən irəli gələn məsələlərə dair tədbir olub.

Tədbiri giriş sözü ilə açan Naxçıvan Tibb Kollecinin direktoru Sona Məmmədova Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamının əhəmiyyətindən danışıb.
Qeyd edilib ki, ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi bilikli və təcrübəli gənc kadrların hazırlanmasına böyük imkanlar yaradacaqdır.

      Naxçıvan Tibb Kollecinin müəllimi Leyla Vəliyeva qeyd edib ki, qarşıya qoyulan vəzifə muxtar respublikada investisiya mühitini yaxşılaşdırmaq, yaradıcı düşüncəni və inkişafa xidmət edən ən yaxşı layihələri üzə çıxarmaq, innovativ ideyaların uğurlu biznes sahəsinə çevrilməsinə dəstək olmaqdır. Belə layihələrin həyata keçirilməsi nəticəsində tələbə komandaları azad sahibkarlığın prinsiplərini öyrənir, öz ideyalarını təcrübədə tətbiq edir və əldə etdikləri bilikləri digərləri ilə bölüşürlər.

Tədbirin sonunda startap lahiyələri haqqında videoçarx izlənib.

17.04.2019-cu il tarixdə Naxçıvan Tibb Kollecində “Hemofiliya” mövzusunda elmi-praktik konfrans keçirilmiş, konfransda Naxçıvan Tibb Kollecinin direktoru,  müəllim -tələbə  heyəti iştirak etmişdir.

          Naxçıvan Tibb Kollecinin direktoru Sona Məmmədova konfransı giriş sözü ilə açaraq, hemofiliya xəstəliyi haqqında slaydlarla ətraflı məlumat vermişdir. Konfransda  qeyd edilmişdir ki, Prezident İlham Əliyev tərəfindən 2005-ci ildə “Hemofiliya və talassemiyalı irsi qan xəstəliyinə düçar olmuş şəxslərə dövlət qayğısı” haqqında Fərman imzalanıb. Bununla əlaqədar əhali arasında vaxtaşırı maarifləndirmə kampaniyası aparılır. Ölkəmizdə, o cümlədən muxtar respublikada uğurla həyata keçirilən “Hemofiliya və talassemiya irsi qan xəstəlikləri üzrə Dövlət Proqramı” irsi qan xəstəliyindən əziyyət çəkənlərin həyat tərzinin yaxşılaşdırılmasına və ömürlərinin uzadılmasına xidmət edir. Proqram çərçivəsində xəstələr dərman preparatları ilə pulsuz təmin olunurlar. Eyni zamanda, Naxçıvan Muxtar Respublikası Səhiyyə Nazirliyi və digər dövlət qurumları tərəfindən vaxtaşırı təşkil edilən könüllü qanvermə aksiyalarından toplanan qan irsi qan xəstəliyindən əziyyət çəkənlərin müalicəsinə sərf olunur.

        08.04.2019-cu il tarixdə Naxçıvan Tibb Kollecində “7 aprel Ümumdünya Sağlamlıq Günü”nə həsr olunmuş konfrans keçirilmişdir. Konfransı giriş sözü ilə Naxcıvan Tibb Kollecininm direktoru Sona Məmmədova açmışdır. Çıxış edərək bildirmişdir ki,  7 aprel Ümumdünya Sağlamlıq günüdür. 1948-ci ildə Birinci Ümumdünya Səhiyyə Assambleyası Ümumdünya Səhiyyə Təşkilatının yaradılmasını qeyd etmək məqsədilə bu günün təsis edilməsi təşəbbüsü ilə çıxış edib. Ümumdünya Sağlamlıq günü 1950-ci ildən başlayaraq hər il aprelin 7-də qeyd edilir. Həmin tarixi andan dünyanın 200-ə yaxın dövləti DST-nin üzvü olub. Dünya Sağlamlıq Günü münasibətilə tədbirlər insanların sağlamlığın çox böyük əhəmiyyət daşıdığını başa düşməsi üçün keçirilir. Dünya Sağlamlıq Günü hər il dünya səhiyyəsi qarşısında duran qlobal problemlərə həsr olunur və müxtəlif devizlər altında keçirilir. DST-nin Avropa Regional Komitəsinin sessiyasının 2011-ci ilin sentyabrında ölkəmizdə də bu gün qeyd olunur.

       Azərbaycanda səhiyyə sahəsində islahatlar mərhələsinin əsası ulu öndər Heydər Əliyev tərəfindən qoyulub. Bu gün muxtar respublika səhiyyəsi özünün yeni inkişaf mərhələsini yaşayır. Belə ki,  səhiyyə sistemindəki köklü dəyişikliklər göz önündədir. Muxtar respublikanı modern texnologiyaların tətbiq olunduğu məkana çevirmək məqsədini qarşıya qoyan muxtar respublika rəhbərliyinin diqqət və qayğısı ilə müasir tibb müəssisələri tikilib istifadəyə verilir, köhnə tibb ocaqları yenidən bərpa olunur, onların maddi-texniki bazası yenilənir, səhiyyə sistemi dünyanın ən müasir tibbi texnika və avadanlıqları ilə təmin olunur. Bu illər ərzində yüzlərlə tibb ocağının inşası və ya yenidən qurulub istifadəyə verilməsi səhiyyə sisteminin inkişafına mühüm töhfələrdəndir. Bu, hər şeydən əvvəl dövlətin öz vətəndaşlarının sağlamlığının qeydinə qalması deməkdir. Əhaliyə dünya standartları səviyyəsində tibbi xidmətlər göstərilməsi, insanların sağlamlığının etibarlı mühafizəsi üçün davamlı tədbirlər həyata keçirilir. Səhiyyə islahatlarının mühüm istiqaməti olan tibb müəssisələri şəbəkəsinin və strukturun təkmilləşdirilməsi sahəsində də məqsədyönlü tədbirlər həyata keçirilir. Muxtar respublikada səhiyyə dövlət siyasətinin prioritet istiqaməti elan edilmiş, əhalinin sağlamlığının qorunması və tibbi xidmətin keyfiyyətinin yaxşılaşdırılması isə daim diqqət mərkəzində saxlanılır. 

Tədbirin sonunda Naxçıvan Tibb Kolecinin 57 müalicə qrupunun hazırladığı videoçarxlar izlənilmişdir.

        12.03.2019-cu il tarixində Naxçıvan Tibb Kollecində Fövqəladə Hallar Nazirliyinin əməkdaşları "Fövqəladə halların tibbi-sanitar nəticələrinin aradan qaldırılmasında sanitar drujinaların rolu" mövzusunda konfrans keçirdi. Konfransda  Naxçıvan Tibb Kollecinin direktoru, müəllim heyəti və tələbələri iştirak etdi.

       Kollecin direktoru Sona Məmmədova konfransı giriş sözü ilə açaraq bildirmişdir ki, fövqəladə hallar zamanı orta tibb işçilərində yaradılan sanitar drujinaların ilk tibbi yardımı həmişə xüsusi önəm və əhəmiyyət kəsb etmişdir.

        Konfransda Mülki müdafiə işinin təşkili şöbəsinin əhalinin mülki müdafiə və fövqəladə hallara hazırlıq bölməsinin mülki müdafiə qüvvələrinin hazırlığı üzrə baş məsləhətçisi dövlət qulluqçusu Azadə Cəfərova "Təbii fəlakətlər zamanı xəsarət almış insanlara həkimə qədərki yardımın göstərilməsində sanitar heyyətlərin fəaliyyəti mövzusunda, mülki müdafiə işinin  təşkili şöbəsinin əhalinin mülki müadfiəyə və fövqəladə hallara hazırlıq bölməsinin əhalinin maarifləndirilməsi və metodiki təşkili ürzə baş məsləhətçisi Əbülfəz Qafarov "Tibb Kollecində mülki müadfiə vəzifələrinin yetirlməsində  obyekt mülki müdafiə qüvvələrinin rolu" mövzusunda çıxış etdilər.

Konfransın sonunda videoçarx izlənildi.

06.03.2019 cu il tarixdə Naxçıvan Tibb Kollecində Naxçıvanın 95 - ci ildönümünə həsr olunmuş tədbir keçirilmişdir. Kollecin direktoru Sona Məmmədova  tədbiri giriş sözü ilə açaraq muxtariyyətin yaranması tarixindən və bugünkü inkişafından bəhs edərək hər kəsi bu gün münasibəti ilə təbrik elədi.

  Sonra kollecin müəlliməsi  Pakizə Babayeva      " Naxçıvanın muxtariyyəti əbədidir " mövzusunda çıxış edərərk  Naxçıvanın ta qədimdən bu günə qədər keçdiyi tarixi inkişaf yolundan və Ümumilli Lider Heydər Əliyevin Naxçıvanın inkişafında olan böyük rolundan, muxtar respublikanın tarixi abidələrindən, turizim bölgələrindən, Naxçıvanın yetişdiridyi dahi şəxsiyyətlərdən və Günnüt qələbəsindən danışdı. Daha sonra Kollecin tələbələri  Aytac Mərdanlı , Leylan Cəfərova Naxçıvan həsr etdikləri şeirlərlə çıxış etdilər.

Tədbirin sonunda isə kollecin tələbələri Sübhan Rəhimli və Orxan Vəliyevin hazırladıqları videoçarx izlənildi.

     Bu gün Naxçıvan Tibb Kollecində 1 Mart - Ümumdünya Mülki Müdafiə gününə həsr olunmuş tədbir keçirilmişdir. Tədbirdə əhalinin təbii və texnogen xarakterli fövqəladə hallardan mühafizəsinin təşkili qaydalarından söhbət açılmıışdır. Tələbələrə təbii qazdan düzgün istifadə , dəm qazı zəhərlənmələri zamanı ilk yardımın göstərilməsi haqqında  məlumat verilmişdir. Tədbirdə Naxçıvan Tibb Kollecinin Mülki Müdafiə Qərargah rəisi S.A.Şaxtaxtinskaya və Fövqəladə Hallar Nazirliyinin mülki müdafiə işinin təşkili şöbəsnin mülki müdafiə işinin təşkili və planlaşdırılması bölməsinin rəisi kapitan Rəcəb Səfərov çıxış etmişdir.

          26.02.2019 - cu il tarixdə Naxçıvan Tibb Kollecində Xocalı soyqırımına həsr olunmuş tədbir keçirildi. 

         Tədbirdə Kollecin direktoru Sona Məmmədova giriş sözü ilə açaraq bildirmişdir ki, Xocalı soyqırımı - xalqımızın qan yaddaşının ən dəhşətli səhifəsi İnsanlığa qarşı öz vəhşiliyinə və qəddarlığına görə kütləvi terror hadisələrindən biri kimi tarixə düşmüş Xocalı soyqırımının törədilməsindən 27  il keçir. 1992-ci ilin 25-dən  26-na keçən fevral gecəsi Ermənistan Silahlı qüvvələri Sovet İttifaqı ordusundan qalmış 366-cı alayın köməyi və iştirakı ilə Xocalı sakinlərinə qarşı dəhşətli soyqırım törətmişlər. Misli görünməmiş vəhşiliklə həyata keçirilən bu soyqırım XX əsrin ən dəhşətli faciələrindən biridir. Dinc, silahsız xocalılara bir gecənin içində amansız divan tutulmuşdur. Soyqırım nəticəsində yüzlərlə xocalılı sakinləri həlak olmuşdur. Yüzlərlə insan yaralanmış, xəsarət almış, şikəst olmuş, əsir düşmüşdür. . Onlar respublikamızın ərazi bütövlüyü yolunda şəhid olublar, xalqımızın milli azadlıq yolunda apardığı mübarizənin qurbanlarıdır. Onların faciəli surətdə şəhid olması Azərbaycan xalqının qəhrəmanlığının, mətanətinin, cəsarətinin nümayişidir.

         Daha sonra isə Naxçıvan Tibb Kollecinin  müəllimi Nigar Səfərova " Xocalı faciəsi " movzusunda və Rəna Vəliyeva            "Tarixin gerçəklikləri " mövzusunda  çıxış etdilər.

       Tədbirin sonunda Kollecin tələbəsi  Aytac Mərdanlının hazırladığı videoçarx izlənildi.

2 fevral - Gənclər Günü münasibəti ilə Naxçıvan Muxtar Respublikası Gənclər və İdman Nazirliyinin təşkilatçılığı ilə Duzdağ otelində Muxtar Respublikanın fəal gənclərinin mükafatlandırma mərasimi keçirilmişdir. Tədbirdə Naxçıvan Tibb Kollecinin tələbəsi Cəlilov Coşqun Həbib oğlu əlaçı tələbə nominasiyası üzrə diplom və hədiyyələrlə təltif olunmuşdur.