Naxçıvan Muxtar Respublikası Fövqəladə Hallar Nazirliyi ilə Naxçıvan Tibb Kolleci  birgə  29-30 may tarixlərində Mülki Müdafiə Alayı və Xüsusi Riskli Xilasetmə Xidməti cəlb olunmaqla “Təbii fəlakət rayonlarında, radioaktiv, kimyəvi və bioloji zədələnmə ocaqlarında xilasedicilərin və sanitar heyətlərin birgə fəaliyyətinin təşkili” mövzusunda keçirilən taktiki xüsusi təlimin əsas məqsədi fövqəladə halların müxtəlif şəraitlərində Tibb Kollecinin idarəetmə orqanlarının və mülki müdafiə qüvvələrinin fəaliyyət səviyyəsini yoxlamaq, Tibb Kollecinin komandaları arasında fövqəladə hallara hazırlıqla bağlı intellektual bilik yarışması keçirmək, kimyəvi zəhərlənmə ocağından xəsarət alanların təxliyə edilməsi üzrə sanitar heyətlərin təxliyə komandaları arasında yarış təşkil etmək, sanitar heyətlərin və hərbi feldşer komandasının əməli vərdişlərini möhkəmləndirmək, radioaktiv, kimyəvi və bioloji zədələnmə ocaqlarında, döyüş bölgəsində və təbii fəlakət rayonlarında xəsarət alanlara ilk tibbi yardımın göstərilməsi bacarığını təkmilləşdirməkdən ibarət olmuşdur.
Naxçıvan Muxtar Respublikası Fövqəladə Hallar Nazirliyi və Naxçıvan Tibb Kolleci birgə keçiridyi təlimin birinci mərhələsində fövqəladə halların müxtəlif şəraitlərində Tibb Kollecinin idarəetmə orqanlarının və mülki müdafiə qüvvələrinin fəaliyyətə hazırlığı yoxlanılmış, sanitar heyətlərin və hərbi feldşer komandasının nəzəri biliklərinin möhkəmləndirilməsi məqsədilə komandalar arasında intellektual bilik yarışması keçirilmişdir. Komandalara Naxçıvan Muxtar Respublikası ərazisində ehtimal olunan təbii və texnogen xarakterli fövqəladə hallar, belə hallarda alınan xəsarətlər və ilk yardımın göstərilməsi üsulları, eləcə də Fövqəladə Hallar Nazirliyinin fəaliyyəti və emblemi ilə bağlı 30 sual təqdim edilmişdir. Fövqəladə Hallar və Səhiyyə Nazirliklərindən təyin olunmuş münsiflər yarışın nəticələrini qiymətləndirmiş, ən yaxşı komanda qalib elan olunmuşdur. Sonra “Radiasiya təhlükəsi” siqnalı üzrə Kollecin tələbələrinin gözlənilən fəaliyyəti məşq etdirilmişdir.
İkinci mərhələdə sanitar heyətlərin və hərbi feldşer komandasının əməli vərdişlərinin möhkəmləndirilməsi, radioaktiv, kimyəvi və bioloji zədələnmə ocaqlarında, döyüş bölgəsində və təbii fəlakət rayonlarında xəsarət alanlara ilk tibbi yardımın göstərilməsi bacarığının təkmilləşdirilməsi Fövqəladə Hallar Nazirliyinin Mülki Müdafiə Alayının təlim mərkəzində davam etdirilmişdir.
Təlimin keçirilmə planına uyğun olaraq əvvəlcə hərbi feldşer ixtisasının tələbələri və sanitar heyətlər təntənəli marşla tribuna önündən keçmiş, daha sonra əleyhqazın geyinilməsini komanda və manqa şəklində həyata keçirmişdir. Təxliyə komandaları arasında yarış təşkil edilərək tüstülü zonadan zərərçəkmişlərin xərək vasitəsilə təxliyə olunması təmin edilmişdir.
Hərbi feldşer komandası döyüş bölgəsindən yaralıların müxtəlif üsullarla təxliyə edilməsi və onlara ilk tibbi yardımın göstəriməsini nümayiş etdirmiş, minalanmış ərazidə qalan yaralı əsgərlərin təxliyə edilməsi və ilk yardımın göstərilməsini Mülki Müdafiə Alayının pirotexnik taqımı və hərbi feldşer komandası yerinə yetirmişdir.
Növbəti təlim yerində 2 nömrəli sanitar heyətin manqaları kimyəvi zəhərlənmə ocağında fəaliyyət göstərmiş, ərazinin vəziyyətinin öyrənilməsi məqsdilə kəşfiyyat işləri aparılmış, zəhərlənmənin lokallaşdırılması və ləğv edilməsi həyata keçirilmişdir. Eyni zamanda zəhərlənmə ocağında qalmış insanların təxliyə ediməsi təşkil edilmiş, karantin zonasından çıxarılmış zərərçəkənlər qismən və tam sanitar təmizləmədən keçirilmişdir. Daha sonra səhra duş kabinasında onların kimyəvi təmizlənməsi həyata keçirilmişdir.
1 nömrəli sanitar heyət şərti yaradılmış zəlzələ ocağında xilsedicilərlə çiyin-çiyinə fəaliyyət göstərərək zərərçəkənlərə hadisə yerində və çadırlarda ilk tibbi yardımın göstərilməsini təmin etmişdir. İlk növbədə fəlakət ocağında xilasedicilərin və xüsusi cihazların köməyi ilə uçqun və dağıntılar altında, uçmuş binaların zirzəmilərində və quyularda qalmış insanların axtarışı təşkil edilmiş, sonra isə xüsusi kəsici alətlərdən, xilasetmə vasitələrindən istifadə etməklə zərərçəkənlərin xilas edilməsi təmin edilmişdir. Sanitar heyətlər zədələnmə ocağında yaralanmalar, kəllə-beyin travması, döş qəfəsinin sıxılması, pnevmotoraks, sınıqlar, günvurma və elektrotravma, uzunmüddətli sıxılma sindromu ilə daxil olan zərərçəkmişlərə ilk yardımın göstərilməsini, onların təxliyəsini və çadırda həkiməqədərki yardımın göstərilməsini həyata keçirmişlər.
Təlim zamanı 3 nömrəli sanitar heyətin manqaları təbii fəlakət ocağında qanaxmalar, yanıqlar, məişət zəhərlənmələri və ilan sancması hallarında zərərçəkənlərə ilk yardımın göstərilməsi üzrə bacarıqlarını nümayiş etdirmişdir.
Sanitar heyətlərin və hərbi feldşer komandasının fəaliyyətinə Naxçıvan Muxtar Respublikası Fövqəladə Hallar Nazirliyindən və Respublika Xəstəxanasından təyin edilmiş hakimlər nəzarət etmiş və onların əməli fəaliyyətinə qiymət verilmişdir.
Təlimin üçüncü mərhələsində Mülki müdafiə alayının və Xüsusi Riskli Xilasetmə Xidmətinin xilasediciləri təyinatı üzrə peşə hazırlıqlarını Tibb Kollecinin müəllim-tələbə heyətinə nümayiş etdirmişdir.
Mülki müdafiə alayının xilasediciləri öz fiziki dözümlülüyünü, mənəvi-psixoloji və fiziki hazırlığını 18 elementdən ibarət maneələr zolağında nümayiş etdirmiş, qarşılarına çıxan bütün maneələri məharətlə dəf etmişlər.
Alpinist təlim mərkəzində Xüsusi Riskli Xilasetmə Xidmətinin xilasediciləri yüksək mərtəbəli binalardan zərərçəkənlərin vento avadanlığından istifadə etməklə, bermud vasitəsilə xilas edilməsini və onlara ilk yardımın göstərilməsini təmin etmişlər.
Təlim uğurla başa çatmış, qarşıya qoyulmuş məqsədlərə nail olunmuşdur.
Qeyd edək ki, təlimə ümumilikdə 255 nəfər şəxsi heyət, 2 xilasedici it, 2 ədəd avtobus, 3 ədəd təcili tibbi yardım avtomobili, 1 ədəd yanğınsöndürmə, 1 ədəd qəza-xilasetmə avtomobili və 1 ədəd motosiklet cəlb olunmuşdur. Təlim yerində xilasetmə işlərinin aparılması və ilk tibbi yardımın göstərilməsi üçün 4 ədəd çadır qurulmuş, tibbi yardım çantalarından, pirotexnika, xilasetmə və alpinist avadanlıqarı və cihazlarından, həmçinin Dekon duş kabinası, fərdi mühafizə vasitləri, radiasiya və kimya kəşfiyyat cihazlarından istifadə olnmuşdur.

27.05.2019-cu il tarixdə Film Fondunda Naxçıvan Tibb Kolleci ilə Naxçıvan Muxtar Respublikası Film Fondu ilə birgə 28 May-Respublika günü ilə əlaqədar tədbir keçirmişdir.

24.05.2019-cu il tarixdə 28 May-Respublika Günü münasibəti ilə ali və orta təhsil müəsisələrinin tələbələri arasında keçiriləcək atıcılığın TİR növü üzrə Naxçıvan Muxtar Respublika birinciliyi keçrilmişdir. Yarışda  Naxçıvan Tibb Kollecinin 5 nəfərdən ibarət komandası iştirak etmiş və 2-ci yerə layiq görülmüşdürlər.

23.05.2019- cu il tarixdə Naxçıvan Muxtar Respublikası Ali Məclisi Sədrinin “Duzdağ Fizioterapiya Mərkəzinin 40 illik yubileyinin keçirilməsi haqqında” 2019-cu il 16 may tarixli Sərəncamının icrası ilə əlaqədar “Duzdağ” otelində elmi konfrans keçirilib.
Tədbiri giriş sözü ilə açan Naxçıvan Muxtar Respublikasının Səhiyyə naziri Niyazi Novruzov bildirib ki, bu gün dünyanın müxtəlif ölkələrindən yuxarı tənəffüs yolları, ağciyər xəstəlikləri və allergiyalardan əziyyət çəkən yüzlərlə insanın üz tutduğu mərkəz ötən müddət ərzində dövlətimizin qayğısı sayəsində öz fəaliyyət imkanlarını xeyli genişləndirib. Muxtar respublika rəhbəri­nin tapşırığı ilə bir neçə dəfə ­təmir-bərpa olunan şəfa ocağı müalicə turizminin inkişafına böyük stimul verib. Qeyd olunub ki, Ali Məclis Sədrinin müvafiq sərəncamı ilə bu il mərkəzin yaranmasının 40 illiyinin yüksək səviyyədə qeyd olunması, yubileylə əlaqədar əməkdaşların mükafatlandırılması, eləcə də şəfa ocağı üçün yeni inzibati binanın tikilməsi haqqında göstərişin verilməsi muxtar respublikada dövlətin səhiyyəyə, tibb işçilərinə, onların əməyinə verilən ən böyük qiymətidir.

Elmi konfransda Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Surə Seyidin “Naxçıvan Muxtar Respublikası səhiyyəsinin inkişafında Duzdağ Fizioterapiya Mərkəzinin rolu” , Naxçıvan Muxtar Respublikası Turizm Departamentinin direktoru Əkbər Novruzovun “Duzdağ Fizioterapiya Mərkəzinin səhiyyə turizminin inkişafında yeri”, Azərbaycan Tibb Universitetinin Klinik allerqologiya və immunologiya kafedrasının müdiri, tibb elmləri doktoru, professor Lalə Allahverdiyevanın “Bronxial-astma xəstəliyində Duzdağ Fizioterapiya Mərkəzində aparılan müalicənin effektivliyi”, Duzdağ Fizioterapiya Mərkəzinin baş həkimi Heyran Qazı­bəyovanın “Dünyada bənzəri olmayan müalicə ocağı”, mərkəzin həkim-pulmonoloqu, Naxçıvan Muxtar Respublikasının Əməkdar həkimi Nizami Şaxtaxtinskinin “Allergik xəstəliklərdə speleoterapiyanın rolu”, Naxçıvan Muxtar Respublikası Ağciyər Xəstəlikləri Dispanserinin baş həkimi İlqar Rza­yevin “Bronxial-astmanın əmələ gəlməsində xroniki su və mineral çatışmazlığının rolu” mövzularında məruzələri dinlənilib, slaydlar nümayiş olunub.
Fitoterapevtlər Cəmiyyətinin sədri, tibb üzrə fəlsəfə doktoru Məlahət Qəhrəmanova konfransda çıxış edib.
Sonra bir qrup səhiyyə işçisinə pul mükafatları təqdim olunub, “Duzdağ Fizioterapiya Mərkəzi – 40” filmi nümayiş etdirilib, Naxçıvan Dövlət Filarmoniyasının kamera orkestrinin çıxışı dinlənilib.

Naxçıvan Tibb Kollecinin direktoru Sona Məmmədova və bir qrup müəllim-tələbə heyyəti ilə konfransda iştirak edib.

22 aprel -20 may  2019-cu il  tarixdə Naxçıvan  Tibb  Kollecindən 1 aylıq təcrübə mübadiləsi  üçün Türkiyə  Respublikasının  Ankara  şəhərində  yerləşən Halide Edip Mesleki və Teknik Anadolu Lisesinə  2  müəllim və 10 tələbədən ibarət heyyət göndərilmişdir. Heyyətimiz Ankara şəhərində  yerləşən Yenimahalle Yıldırım Beyazit Eğitim və Araşdırma  xəstəxanasına təkim olunmuşdur.  Xəstəxanada egitim bölümünün tibb bacıları  müəllim və tələbələri rəhbərliklə tanış  etdikdən sonra, şöbələrə bölgü aparılmışdır. Tibb bacısının işi ixtisası üzrə təhsil alan tibb bacıları daxıli xəstəliklər, yoluxucu xəstəliklər, təcili təxirəsalınmaz yardım və endoskopiya  bölmələrində təcrübə keçmişlər.  Tələbələr xəstələrin qeydiyata alınması, yataq xəstələrinə qulluq,  xəstələrin əməliyata hazırlanması, əməliyyatdan sonra xəstəyə qulluq, gündəlik təyinatların yerinə yetirilməsi, xəstələrə konyula qoyulması, endoskopiya bölməsində xəstələrin müayinəyə hazırlamnası qaydalarını öyrənmişlər.

Laborator diaqnostika ixtisası qrupunun tələbələri mikrobiologiya, patologiya, hematologiya və biokimya labaratoriyalarında təcrübə keçmişlər. Laboratoriyalarda tələbələr təhlükəsizlik qaydaları ilə tanış olduqdan sonra qruplara  bölünərək laborantlara təhkim olunmuşlar. Mikrobiologiya  laboratoriyasında  nümunələrin əkilməsı, boyanması, antibiotiklərə həssaslıq testlərinin qoyulması qaydaları, patologiya laboratoriyasında nümunə və ya çıxarılmış orqanlardan alınan materialların kəsilməsi, parafinə yatırılması, qurudulması, boyanması və xüsusi avadanlıqlarla dahab kiçik hissələrə kəsilməsi qaydalarını öyrənmişlər. Biokimya və hematologiya bölmələrində  avadanlıqlara reaktivlərin yerləşdirilməsi, periferiyadan alınan qandan yaxma  hazırlanması, qan nümunələrinin müxtəlif laborator cihazlara yerləşdirilməsi,  nəticələrinin alınması  və kompüter sisteminə yerləşdirilməsini öyrənmişlər.

18 may 2019- cu il tarixində Məhəmmədağa Şahtaxtlı adına Naxçıvan şəhər  - “Kitab evi” də Naxçıvan Tibb kollecinin 3-cü kurs tələbəsi  Aytac  Mərdanlının “12 il Öncə” adlı kitabının təqdimatı keçirilib. Aytac Mərdanlı çıxışında bildirib ki, keçən il o “Gizlənqaç” adlı şeir kitabı ilə oxucuları ilə görüşüb. Bu dəfə isə gənc şairə oxucuların qarşısına yazdığı hekayə ilə çıxdı.  Hekayədə Ayşə adlı balaca bir türk qızının illər sonra Naxçıvan Muxtar Respublikası ilə olan bağlılığı, 2032-ci ildə Azərbaycan respublikasının böyük qələbəsinin 12-ci illiyi və “Turan” Türk Dünyası Birliyinin mükafatlandırılması haqqında söz açılıb. Bizdə Naxçıvan Tibb kolleci əməkdaşları adından gənc yazıçıya işlərində uğurlar diləyirik.

   14.05.2019-cu il tarixdə Naxçıvan Tibb Kollecində Naxçıvan Muxtar Respublikasının Maliyyə Nazirliyi yanında Maliyyə Tədris Mərzkəzi "Gənclərdə  Büdcə Savadlılığı" mövzusunda təlim keçirildi.

    Tədbiri giriş sözü ilə kollecin direktoru Sona Məmmədova açıb. Tədbirdə "Tədbirin mahiyyəti və aktuallığı" barədə Naxçıvan Muxtar Respublikası Maliyyə Nazirliyi yanında Maliyyə Tədris Mərkəzinin direktoru i.ü.f.d Sevinc Cabbarova, "Dövlət büdcəsini anlayaq" mövzusunda Naxçıvan Muxtar Respublikası Maliyyə Nazirliyinin baş məsləhətçisi Ramil Hüseynov, "Tələbə büdcəsinin idarə olunması" mövzusunda Naxçıvan Muxtar Respublikası Maliyyə Nazirliyinin baş məsləhətçisi Xəlil Vəlizadə tərəfindən slaydlarla çıxışlar olunub. Çıxışlarda tələbələrin maliyyə savadlılığı, tələbə büdcəsinin formalaşdırılması və idarə olunmasının əhəmiyyətindən söz açılıb. Bildirilib ki, maliyyə savadlılığının artırılması sahəsində keçirilən tədbirlərin əsas məqsədi gəlirlərdən daha səmərəli istifadə, xərclərin optimal bölüşdürülməsi, xərcləmələr zamanı düzgün qərarların verilməsi, həmçinin sərbəst vəsaitlərin gəlirli sahələrə investisiya edilməsi kimi vərdiş və bacarıqların formalaşdırılmasından ibarətdir. Həmçinin qeyd olunub ki, büdcə planlaşdırılmırsa, gəlirlər kortəbii şəkildə xərclərə yönəldilirsə, qənaət yoxdursa, israfçılığa yol verilirsə, gəlir çox olsa belə, xərcləmələrin qarşısını almaq mümkün olmur. Bu baxımdan büdcənin planlaşdırılması, əldə olunan gəlirlərin və edilən xərclərin müəyyənləşdirilməsi və bu prosesin mütəmadi davam etdirilməsi maddi problemlərin öhdəsindən gəlinməsinə və əsassız borclanmalara yol verilməməsinə səbəb olur.

    Təlim 2 mərhələli keçirildi. Birinci mərhələ nəzəri hissə, ikinci mərhələ müsabiqə mərhələsi oldu.

    Təlimin sonunda müabiqə mərhələsinin qalibləri mükafatlandırıldı.

10.05.2019-cu il tarixdə Naxçıvan Tibb Kollecində" Ümummilli Lider Heydər Əliyevin doğum günü"nə həsr olunmuş konfrans keçirildi. Konfransda həmin kollecin müəllim və tələbə heyəti iştirak etdi. Konfransı kollecin direktoru Sona Məmmədova giriş sözü ilə açaraq bildirdi ki, hər il 10 may tarixində Azərbaycan xalqı ən görkəmli dövlət xadimlərindən biri, milli yaddaşımızda silinməz izlər buraxan, müasir Azərbaycan dövlətinin qurucusu Heydər Əliyevin, Azərbaycan xalqının Ümummilli liderinin əziz xatirəsini hörmətlə yad edir. Ümummilli liderin 96-cı doğum gününün yad edilməsi, özündən sonra böyük mənəvi irs qoymuş bu dahi şəxsiyyətin fəaliyyətinə nəzər salmağa imkan verir.

Heydər Əlirza oğlu Əliyev 1923-cü il mayın 10-da Azərbaycanın Naxçıvan şəhərində dəmiryolçu ailəsində dünyaya gəlmişdir. 1939-cu ildə Naxçıvan Pedaqoji Texnikumunu bitirdikdən sonra Azərbaycan Sənaye İnstitutunun memarlıq fakültəsində təhsil almışdır.

Heydər Əliyev 1941-1944-cü illərdə Naxçıvan MSSR Xalq Daxili İşlər Komissarlığında və Naxçıvan MSSR Xalq Komissarları Sovetində müxtəlif məsul vəzifələrdə xidmət etmiş, 1944-cü ilin mayında isə Naxçıvan Vilayət Partiya Komitəsi tərəfindən dövlət təhlükəsizliyi orqanlarına işə göndərilmişdir. O, Leninqrad (indiki Sankt-Peterburq) və Moskva şəhərlərində  ali təhsil almış, 1957-ci ildə isə Azərbaycan Dövlət Universitetinin tarix fakültəsini bitirmişdir.

Dövlət təhlükəsizliyi orqanlarında iyirmi beş il (1944-1969) çalışan Heydər Əliyev 1965-ci ildə Azərbaycan SSRİ Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildə isə sədri vəzifəsinə irəli çəkilmişdir. 1969-cu ildə Heydər Əliyev Azərbaycan KP MK-nın birinci katibi seçilərək 1982-ci ilə qədər Azərbaycan SSR-ə rəhbərlik etmişdir.

Heydər Əliyevin respublikaya rəhbərlik etdiyi dövrdə (1969-1982) idarəçiliyin möhkəmlənməsi, kadrlara qarşı tələbkarlığın artırılması nəticəsində iqtisadi-sosial sahədə böyük nailiyyətlər əldə edildi. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilmiş və SSRİ-nin rəhbərlərindən biri olmuşdur.

1990-cı ilin iyulunda Azərbaycana qayıdan Heydər Əliyev ilk əvvəl Bakıda, sonra isə Naxçıvanda yaşamış, həmin ildə də Azərbaycan Ali Sovetinə deputat seçilmişdir. O, 1991-1993-cü illərdə Naxçıvan Muxtar Respublikasının Ali Məclisinin sədri, Azərbaycan Respublikası Ali Sovetinin sədr müavini olmuş, Ali Sovetin sessiyalarında fəal iştirak etmişdir.

Azərbaycan xalqı 1993-cü ilin may-iyununda ölkədə vətəndaş müharibəsi və müstəqilliyin itirilməsi təhlükəsi yarandıqda Heydər Əliyevin hakimiyyətə gətirilməsi ilə ayağa qalxdı, bu, əsl mənada, milli hərəkata çevrildi. 1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçildi. Onun Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, elmi-mədəni həyatında, beynəlxalq əlaqələrində dönüş yarandı, elmi əsaslara, beynəlxalq norma və prinsiplərə uyğun müstəqil dövlət quruculuğu prosesi başlandı. Daxili sabitliyin əldə edilməsi və qorunması istiqamətində yorulmadan çalışan Heydər Əliyev, 1993-95-ci illər ərzində daxili birliyi təmin edərək, ölkənin çiçəklənməsi prosesinin əsasını qoydu.

1995-ci ilin noyabrında referendum yolu ilə Azərbaycan Respublikasının ümumbəşəri demokratik dəyərləri özündə əks etdirən Konstitusiyasının qəbul edilməsi, 1995 və 2000-ci illərdə çoxpartiyalılıq əsasında demokratik parlament seçkilərinin keçirilməsi, Konstitusiya məhkəməsinin fəaliyyətə başlaması, Azərbaycanda ölüm cəzasının ləğv olunması, "Bələdiyyə seçkiləri haqqında qanun"un və bir sıra digər qanunların qəbulu və əməli surətdə həyata keçirilməsi məhz Heydər Əliyevin adı ilə bağlıdır.

Daha sonra kollecin müəllimləri Rəna Vəliyeva və Nərmin Ələkbərova Ümummilli lider Heydər Əliyev haqqında daha geniş məlumat verdilər.

Konfransın sonunda Heydər Əliyevə həsr olunmuş videoçarx izlənildi.

07.05.2019-cu il tarixdə Naxçıvan Tibb Kollecində “8 may-Beynəlxalq Talassemiya Günü” ilə əlaqədar olaraq elmi-praktik konfrans keçirilmiş, konfransda həmin kollecin  müəllim -tələbə  heyəti iştirak etmişdir.

Naxçıvan Tibb Kollecinin direktoru Sona Məmmədova konfransı giriş sözü ilə açaraq qeyd etmişdir ki, talassemiya xəstəliyinə düçar olan xəstələrə dövlət səviyyəsində qayğı göstərilir. "Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında" qanun qəbul edilmiş, Azərbaycan Respublikası Nazirlər Kabinetinin 2006-cı il 18 yanvar tarixli 15 nömrəli Qərarı ilə "Hemofiliya və talassemiya irsi qan xəstəlikləri üzrə Dövlət Proqramı" təsdiq edilmişdir.

Bu proqrama əsasən isə ilk növbədə hemofiliya və talassemiya xəstələrinin həyat tərzinin yaxşılaşdırılması və ömürlərinin uzadılması qarşıya məqsəd qoyulub. Eləcə də proqramda hemofiliya və talassemiyanın fəsadlarından əmələ gələn əlilliyin və ölüm hallarının azaldılması, bu fəsadların profilaktikasının təşkili və xəstə uşaqların doğulmasının qarşısının alınması sisteminin yaradılması yer alıb.

Talassemiyanın müalicə və profilaktikası üzrə Tədbirlər Proqramı təsdiq edilib. Bu Tədbirlər Proqramı talassemiyalı xəstələr üçün tibbi yardımın daha da təkmilləşdirilməsinə və xəstə uşaqların doğulmasının qarşısının alınmasına yönəlib. Naxçıvan Muxtar Respublikasında, Naxçıvan Muxtar Respublika Xəstəxanasının Hematologiya şöbəsində talassemiyadan əziyyət çəkən xəstələrin müalicəsi üçün işlər görülüb, lazımı avadanlıqlar alınıb. Talassemiyalı xəstələrin müalicəsi gündüz stasionarı şəraitində həyata keçirilir. Gündüz stasionarlarında əsasən xəstələrə qan köçürülür. Xəstələrin digər müalicəsi əsasən evdə, həkimlərin təyinatı üzrə aparılır. Həmin şöbə ən yeni avadanlıqlarla təmin edilib. Xəstəxananın tərkibində Qan Bankı xəstələr üçün donor qanının tədarükü ilə məşğuldur.  

Daha sonra Naxçıvan Tibb Kollecinin müəllimi Arzu Kərimli, talassemiya xəstəliyi haqqında slaydlarla ətraflı məlumat vermişdir.

26.04.2019-cu ildə Naxçıvan Tibb Kollecində  Yeni Azərbaycan Partiyası Naxçıvan Şəhər Təşkilatı Qadınlar Şurası   Akademik Zərifə Əliyevanın 96-cı ildönümünə həsr olunmuş konfrans keçirildi.  

Konfransı  giriş sözü ilə açan  Yeni Azərbaycan Partiyası Naxçıvan Şəhər Təşkilatı Qadınlar Şurasının sədri, Naxçıvan Muxtar Respublikası Ali Məclisinin deputatı, Naxçıvan Muxtar Respublikasının Əməkdar həkimi Yazgül Rzayeva  “Akademik Zərifə xanım Əliyevanın həyatı və yaradıcılığı” haqqında geniş nitq söyləmişdir. Bildirmişdir ki, “İdeal qadın, mehriban ana, sadiq həyat yoldaşı olan və bəşəriyyətə öz sənəti  və  nurlu əməlləri ilə işıqlı bir gələcək bəxş edən Zərifə xanım Əliyevanın anadan olmasının 96-ci il dönümü ilə əlaqədar olaraq toplaşdıqlarını və bu zərif insanın həyatından və elmi uğurlarından geniş söhbət açmışdır.

Yeni Azərbaycan Partiyası  Naxçıvan Şəhər Təşkilatı Tibb Kolleci ərazi ilk təşkilatının sədri Leyla Vəliyeva “Böyük ana haqqında düşüncələr “ mövzusunda çıxış etmişdir. O çıxışında qeyd etmişdir ki, Zərifə xanım Əliyevanın timsalında ilk öncə ideal qadın və əsl Azərbaycan xanımı obrazı canlanır. Hesab edirəm k, i Zərifə xanım Əliyevanın keçdiyi həyat yolu bizim gənc xanımlarımızın həyatının formalaşması baxımından parlaq nümunədir.

Əziz Əliyeva  adına Republika  Uşaq xəstəxanasının oftalmoloqu Kəmalə Əliyeva “ Akademik Zərifə xanım Əliyeva Elmi və ictimai fəaliyyəti ” mövzusunda çıxış etdi. Bildirdi ki, Zərifə xanım Əliyevanın zəngin elmi irsi oftalmologiyanın müxtəlif elmi sahələri üzrə apardığı tədqiqatlar, qazandığı naliyyətlər, yaratdığı fundamental əsərlər Azərbaycan Tibb  elminin parlaq bir səhifəsini təşkil edir. Onun Azərbaycanın Elmlər Akademiyasının həqiqi üzvü seçilməsi onun elmi xidmətlərinin vətənə qanuni təsdiqi olunmuşdur. Onun əsərlərində “Göz yaşının axmasınınn fiziologiyası” ,” Gözün və görmə siniri yolunun yaşla əlaqədar dəyişiklikləri” , “Gözün hidrodinamik sisteminin anatomik – fizioloji təbiəti” və.s  bəhs olunur.

Naxçıvan Dövlət Universiteti tibb fakültəsinin V kurs tələbəsi Bənövşə Qasımova  “Akademik Zərifə xanım Əliyevanın Pedaqoji Fəaliyyəti” haqqında çıxş etdi. Çıxışında Zərifə xanımın Azərbaycan Dövlət Həkimləri Təkmilləşdirmə İnstitunun göz xəstəlikləri kafedrasının professoru vəzifəsinə seçilməsi ilə pedaqoji fəaliyyətinin genişləndirilməsi, həmçinin praktik səhiyyə üçün kadr hazırlığına  və həkimlərin ixtisasının artırılmasına ürəkdən səy göstərməsindən danışdı.