Peyntbol yarışı

18.05.2021-ci il tarixdə  muxtar respublikanın Ali və orta ixtisas təhsili müəssisələrinin oğlanlardan ibarət komandaları arasında keçirilən peyntbol yarışı  Atıcılıq Mərkəzinin peyntbol arenasında reallaşıb. Naxçıvan Muxtar Respublikası Gənclər və İdman Nazirliyi və Atıcılıq Federeasiyasının təşkil etdiyi birincilik gənclərə vətənpərvərlik ruhunun  aşılanması, asudə vaxtlarının idmanla dəyərləndirilməsi və atıcılıq idman növlərinin təbliği məqsədi ilə keçirilmişdir.

Yarışda Naxçıvan Tibb Kollecini təmsil edən beş tələbə və bir məşqçi – müəllimdən ibarət komanda üçüncü yerə layiq görülmüşdür. Qalib komandalara diplom, kubok və peyntbol mərmiləri təqdim edilmişdir.

 

Talassemiya xəstəliyi. İrsi qan xəstəliklərinin meydana çıxmasında qohum nikahların rolu

          Naxçıvan Tibb Kollecində 08.05.2021-ci il tarixdə “Beynəlxalq Talassemiya Günü” ilə əlaqədar “Talassemiya xəstəliyi. İrsi qan xəstəliklərinin meydana çıxmasında qohum nikahların rolu” mövzusunda elmi-praktik konfrans keçirilmişdir.

      Tədbiri giriş sözü ilə açan kollecin direktoru Sona Məmmədova  sağlam həyat tərzinin təbliği məqsədilə elmi-praktik konfransların təşkil olunmasının gələcək nəslin sağlam və məlumatlı böyüməsinə zəmin yaratdığını bildirmişdir. O,  qeyd etmişdir ki,  yaxın qohum evlilikləri zamanı  xəstə uşaqların doğulma riski artır. Buna görə belə nikahlara yol verməmək tövsiyə olunur. O, bildirmişdir ki, talassemiya nəsildən-nəsilə keçən çox ağır irsi qan xəstəliyidir. Talassemiya xəstəliyinə düçar olan xəstələrə dövlət səviyyəsində qayğı göstərilir. "Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında" qanun qəbul edilmiş, Azərbaycan Respublikası Nazirlər Kabinetinin 2006-cı il 18 yanvar tarixli müvafiq Qərarı ilə "Hemofiliya və talassemiya irsi qan xəstəlikləri üzrə Dövlət Proqramı" təsdiq edilmişdir. Bu proqrama əsasən ilk növbədə hemofiliya və talassemiya xəstələrinin həyat tərzinin yaxşılaşdırılması və ömürlərinin uzadılması, onlara göstərilən tibbi yardımın daha da təkmilləşdirilməsi qarşıya məqsəd qoyulub. Eləcə də proqramda hemofiliya və talassemiyanın fəsadlarından əmələ gələn əlilliyin və ölüm hallarının azaldılması, bu fəsadların profilaktikasının təşkili və xəstə uşaqların doğulmasının qarşısının alınması sisteminin yaradılması yer alıb. Həmçinin qeyd olunmuşdur ki, Naxçıvan Muxtar Respublikasında talassemiyalı xəstələrin müayinə və müalicəsi üçün hər bir şərait yaradılmışdır. Naxçıvan Muxtar Respublika Xəstəxanasının Hematologiya şöbəsində talassemiyadan əziyyət çəkən xəstələrin müalicəsi üçün lazımi işlər görülüb, avadanlıqlar alınıb. Talassemiyalı xəstələrin müalicəsi gündüz stasionarı şəraitində həyata keçirilir. Gündüz stasionarında əsasən xəstələrə qan köçürülür. Xəstələrin digər müalicəsi evdə, həkimlərin təyinatı üzrə aparılır. Həmin şöbə ən yeni avadanlıqlarla təmin edilib. Xəstəxananın tərkibində Qan Bankı xəstələr üçün donor qanının tədarükü ilə məşğuldur.

          Sonra kollecin tələbələri  Zeynəb  Rzayeva “Qan haqqında məlumat”,  Könül  Tağıyeva   “Talassemiya nədir”,  Səma Xəlilzadə və Raifə Rüstəmova  “Kiçik betta talassemiya”, Aytac Rzayeva “ Talassemiyanın irsi xüsusiyyətləri haqqında”  mövzuları üzrə slaytlarla çıxış etmişlər.

Mini futbol

     Bu gün muxtar respublikada cəmiyyətin inkişaf edən bütün sahələri kimi idman da  öz çiçəklənmə dövrünü yaşayır. Muxtar respublikada yaradılan müasir idman infrastrukturu, inşa edilən obyektlər dünya standartlarına uyğunlaşdırılır. Turizm infrastrukturunun yaradılması dövlətin bu sahənin inkişafına xüsusi diqqət və qayğısının göstəricisidir.  

      Uşaqlar və gənclər arasında bədən tərbiyəsi və idmanın inkişaf sisteminin formalaşdırılması, təkmilləşdirilməsi, məktəbəqədər yaşlı uşaqların, ümumtəhsil məktəbi şagirdlərinin və tələbələrin fiziki tərbiyə sisteminin inkişaf etdirilməsi, yaşayış yerlərində bədən tərbiyəsi və idman işinin təşkili, əhalinin bədən tərbiyəsi, sağlamlıq və idmanyönümlü məşğələlərə cəlb olunması və digər məsələlər bu sahədə muxtar respublika rəhbərliyinin qarşıya qoyduğu əsas məqsədlərdəndir. Bu gün muxtar respublikada gənc nəslin fiziki və mənəvi cəhətdən sağlam böyüməsi, vətənpərvərlik ruhunda yetişməsi muxtar respublika rəhbərliyinin əsas prioritetlərindəndir. Təbii ki, bu istiqamətdə idmanın rolu danılmazdır. İnsanların asudə vaxtının səmərəli təşkili, uşaq və gənclərin sağlam ruhda tərbiyə alması  üçün hər cür şərait yaradılıb. İdman və bədən tərbiyəsinin kütləviləşməsində klubların, idman məktəblərinin rolunu xüsusi qeyd etmək lazımdır.

      Belə ki, Naxçıvan Muxtar Respublikası Ali Məclisi Sədrinin “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramıˮnın təsdiq edilməsi haqqında 14 fevral 2020-ci il tarixli 459-05/S saylı Sərəncamında verilmiş tapşırıqların icrası ilə əlaqədar 07.05.2021-ci il tarixdə Uşaq Gənclər İdman Məktəbi ilə Naxçıvan Tibb Kollecinin komandaları  arasında mini futbol üzrə yoldaşlıq görüşü keçirilmişdir.

Naxçıvan Muxtar Respublikasında Tibbi kadr hazırlığında Tibb fakültəsinin və Tibb Kollecinin rolu

 

    

           Naxçıvan Tibb Kollecinin müəllim-tələbə kollektivi Naxçıvan Dövlət Universitetində olub. Ali təhsil ocağının Tibb fakültəsində kadr hazırlığı vəziyyəti və maddi-texniki baza ilə tanışlıqdan sonra fakültədə “Naxçıvan Muxtar Respublikasında Tibbi kadr hazırlığında Tibb fakültəsinin və Tibb Kollecinin rolu” mövzusunda tədbir keçirilib. Tədbiri giriş sözü ilə açan universitetin rektoru Elbrus İsayev bildirib ki, tələbələrin təcrübə keçməsində Naxçıvan Muxtar Respublikası Səhiyyə Nazirliyinin tabeliyində olan tibb müəssisələrinin mühüm rolu vardır. Bu da, öz növbəsində ixtisaslı tibbi kadrların hazırlanmasına xidmət edir. Diqqətə çatdırılıb ki, fakültəni bitirən məzunlar fəaliyyətlərini nəinki muxtar respublikamızda, habelə dünyanın bir çox inkişaf etmiş ölkələrində uğurla davam etdirirlər. Naxçıvan Muxtar Respublikasının Səhiyyə naziri Niyazi Novruzov çıxışında Naxçıvan səhiyyəsinin inkişafına dövlət qayğısından danışıb. Bildirilib ki, bu gün səhiyyə sahəsinə göstərilən yüksək qayğı nəticəsində muxtar respublikanın şəhər, rayon və kəndlərində ən müasir standartlara cavab verən xəstəxana, həkim-ambulatoriyası, feldşer-mama məntəqələri əhaliyə keyfiyyətli tibbi xidməti təmin edir. Bütün bunlarla yanaşı, kadr hazırlığı da daim diqqətdə olan məsələlərdəndir.                          Tibb  Kollecinin direktoru Sona Məmmədova muxtar respublikada orta ixtisaslı tibbi kadrların hazırlığında kollecin rolu haqqında çıxış edərək, təşkil edilən görüşün əhəmiyyətindən danışaraq minnətdarlığını bildirib. O, qeyd etmişdir ki, belə görüşlər tibb Kolleci üçün çox əhəmiyyətlidir. Belə ki, bu tanışlıq görüşü gələcəkdə Naxçıvan Dövlət Universitetinin Tibb Fakültəsi ilə Naxçıvan Tibb Kolleci arasında təcrübə mübadiləsinin, müxtəlif  birgə lahiyələrin həyata keçirilməsi üçün artıq zəmin yaratmışdır. Belə birgə fəaliyyət muxtar respublika səhiyyəsi üçün tibbi kadrların yetişdirilməsində əvəzedilməzdir.  Naxçıvan Dövlət Universitetinin Tibb fakültəsinin dekanı, biologiya üzrə fəlsəfə doktoru Elsevər Əsədov fakültənin muxtar respublikada tibbi kadrların hazırlığında rolu barədə çıxış edib. Qeyd olunub ki, fakültədə yaradılan müasir şərait nəticəsində hazırda 6 ixtisas üzrə kadr hazırlığı aparılır. 2012-ci ildən etibarən fakültənin nəzdində rezidentura təhsil pilləsi üzrə həkim-rezident hazırlığının aparılması isə peşəkar həkim kadrların yetişdirilməsində əhəmiyyətli rola malikdir. 2021-2022-ci tədris ili üçün ilk dəfə olaraq Hərbi tibb ixtisası üzrə kadr hazırlığının həyata keçirilməsindən danışan Elsevər Əsədov bildirib ki, bu ixtisas üzrə kadrların hazırlanması gələcəkdə hərbi tibb işçilərinin yetişməsinə öz töhfəsini verəcək. Sonda videoçarxa baxış olub.

Kitab müzakirəsi

 

    Naxçıvan Tibb Kollecinin kitabxanasında Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq edilən və gənc nəsildə vətənpərvərliyin, milli kökə bağlılığın formalaşmasına xidmət edən  “Oxunması zəruri olan kitablar”ın siyahısına daxil edilən amerika ədəbiyyatının görkəmli yazıçısı Ernest  Heminqueyin “Qoca və Dəniz” əsərinin müzakirəsi keçirilmişdir.  Tədbiri giriş sözü ilə açan kollecin kitabxana müdiri Leyla Əliyeva bildirmişdir ki, gənclərin dünyagörüşünün formalaşması, intellekt səviyyəsinin yüksəldilməsi, bilik və bacarığının artırılması, asudə vaxtlarının səmərəli təşkili, həmçinin vətənə, cəmiyyətə layiq əsl vətəndaş kimi yetişməsində “Oxunması zəruri olan kitablar”ın  mühüm rolu var. O, qeyd etmişdir ki, XX əsr Nobel mükafatı laureatı Ernest Heminqueyin “Qoca və Dəniz” povesti yazçının yaradıcılığında mühüm yer tutatn dəyərli əsərlərdəndir. Əsər dünya ədəbiyyatında kiçik həcmli şedevr kimi məşhurdur. Bu povest həyat hadisələrini, insanların qəlb dünyasını, heyrətamiz reallıqla əks etdirən misilsiz bir sənət əsəridir. Əsərdə göstərilir  ki, insan ən ağır məhrumiyyətlərə düçar olanda, çəkdiyi bütün zəhmətlər hədər gedəndən sonra belə öz heyrətamiz həyat eşqini qoruyub saxlaya bilir. “İnsan övladı məğlubiyyət üçün yaranmayıb; insanı məhv etmək olar, lakin onu məğlub etmək mümkünsüzdür” qənaətini təsdiqləyir. İnsan qarşısına qoyduğu məqsədə çatmaq üçün daim mübarizə aparmalıdır, güc, inam, qətiyyət insanın məğlubedilməzliyini göstərir. Əsər bir çox yazıçı və ədəbi tənqidçi tərəfindən Heminqueyin yaradıcılığının zirvəsi kimi qiymətləndirirlir.

    Sonra kollecin tələbələri Aygün Musayeva “Yazıçının həyat və yaradıcılığı”, Vəfa Orucova “Qoca və Dəniz əsəri haqqında ümumi məlumat”, Mirvari Rüstəmova və Özləm Əliyeva “Əsərin qısa məzmunu haqqında”, Günay Zeyniyeva “Qoca və Dəniz əsərinin təhlili” mövzularında çıxış etmişlər.

Atletika Yarış

 

23 aprel 2021-ci il tarixdə Naxçıvan Muxtar Respublika Stadionunda Naxçıvan Tibb Kolleci və Naxçıvan Muxtar Respublikası Atletika Federasiyasının birgə təşkilatçılığı ilə “Zərərli vərdişlərə yox deyək” devizi altında Naxçıvan Tibb Kollecinin oğlan və qız tələbələri arasında atletika növləri üzrə birincilik yarışı keçirilmişdir.

Yarışın məqsədi Naxçıvan Muxtar Respublikasında yeniyetmə və gəncləri atletika idman növünə cəlb etmək, Naxçıvan Tibb Kollecinin oğlan və qız tələbələri arasında atletika idman növünü inkişaf etdirmək və kütləviliyinə nail olmaq və həmçinin  kollecin oğlan və qız tələblərindən ibarət atletika idman növü üzrə yığma komandanın tərkibini müəyyənləşdirməkdir.

Yarışın sonunda qalib olan tələbələr Naxçıvan Tibb Kollecinin və Naxçıvan Muxtar Respublikası Atletika Federasiyasının diplomları ilə mükafatlandırılmışdır.

Tarixə ekskursiya

Gənclərin Naxçıvanın tarixinə  və dahi  şəxsiyyətlərinə aid ekponatların əks olunduğu muzeylərlə daha yaxından tanışlığın təmin edilməsi, onlarda vətənpərvərlik və vətəndaşlıq hisslərinin yüksəldilməsi məqsədi ilə 22 aprel 2021-ci il tarixdə muxtar respublikada fəaliyyət göstərən ali və orta ixtisas təhsili müəssisələrinin tələbələri üçün Naxçıvan Muxtar Respublikası Gənclər və İdman Nazirliyi, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi və “Gənclərin İntellektual İnkişaf Mərkəzi” İctimai Birliyinin birgə təşkil etdiyi “Tarixə ekskursiya” adlı layihə həyata keçilmişdir. Layihənin proqramına əsasən  Azərbaycanın digər bölgələrindən olan və muxtar respublikada təhsil alan tələbələr üçün muzey gəzintisi təşkil olunmuşdur. Tələbələr Naxçıvan şəhərindəki Heydər Əliyev  Muzeyi, Xalça Muzeyi, Cəmşid Naxçıvanskinin Ev Muzeyi, Milli Dəyərlər Muzeyində olmuşlar.  Bələdçilər tərəfindən muzeylərin yaradılma tarixi, aid olduğu şəxsiyyətlərin həyat fəaliyyəti, nümayiş olunan eksponatlar haqqında ətraflı məlumat verilmişdir.

Ekskursiya bitdikdən sonra Naxçıvan Tibb Kollecində həmin tələbələr arasında “Nə?, Harada?,  Nə zaman?” İntellektual oyunu keçirilmişdir.


 

 
 

Maarifləndirici Söhbət

     14 aprel 2021-ci tarixdə Naxçıvan Tibb Kollecində “Startap layihələri və innovativ inkişaf”, “Zərərli vərdişlərə yox deyək”, “Nağdsız qaydada əməliyyatların aparılmasının təşviq edilməsi” mövzularında maarifləndirici görüş keçirilmişdir.

     Naxçıvan Tibb Kollecinin informatika müəllimi Gülşad Axundova tələbələrə “Startap layihələri və innovativ inkişaf”haqqında məlumat vermişdir. O, çıxışında muxtar respublikada elm və təhsilin yeni standartlar çərçivəsində innovativ inkişafa yaradılan şəraitdən danışmışdır. Bildirmişdir ki,  Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamı ümumilikdə təhsil sahəsində yeni islahatların tətbiqinin əsasını qoyub. Bu Sərəncamla bütün təşkilatlar və təhsil müəssisələri arasında əlaqə genişlənib. Qarşılıqlı əməkdaşlıq insan kapitalının inkişafına, iqtisadi cəhətdən dayanıqlı əmək bazarının yaradılmasına, təhsilverənlə işəgötürən arasında tələblərin formalaşmasına xidmət edib, gənclər tərəfindən irəli sürüləcək yeni startaplar üçün münbit zəmin hazırlayıb.

     Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında”  2019-cu il 3 aprel tarixli müvafiq saylı Sərəncamı ilə muxtar respublikanın təhsil tarixində yeni bir dövrün başlanğıcı qoyulub. Sərəncamda “İdeyadan başlanğıca” devizi ilə innovasiyaya və dayanıqlı inkişafa əsaslanan, yaradıcı düşüncəni və elmi-texniki tərəqqini əks etdirən yeni layihələrin – startapların həyata keçirilməsi nəzərdə tutulmuşdur.

    Görüşdə “Startap layihələri və innovativ inkişaf” filmi nümayiş etdirilmişdir.

    Sonra kollecin metodisti Səidə Şahverdiyeva “Zərərli vərdişlərə yox deyək” mövzusunda çıxış edərək tələbələrə asılılıq yaradan zərərli vərdişlər barəsində ətraflı məlumat vermişdir. O, qeyd etmişdir ki, bəşəriyyət üçün ən böyük bəlalardan olan zərəli vərdişlərin törətdiyi fəsadlara qarşı mübarizə bu gün xususilə aktual xarakter daşıyır. Zərəli vərdişlərin əleyhinə aparılan tədbirlər hər zaman ölkə rəhbərliyinin diqqət mərkəzində olmuş, onların gücləndirilməsi istiqamətində bir sıra işlər görülmüşdür. O, bildirmişdir ki, Naxçıvan Muxtar Respublikası Ali Məclisi Sədrinin “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramın”nın təsdiq edilməsi haqqında 14 fevral 2020-ci il tarixli müvafiq saylı Sərəncamına əsasən Naxçıvan Tibb Kolleci tərəfindən 2021-ci ildə görüləcək işlər üzrə tədbirlər planını hazırlamışdır. O, qeyd etmişdir ki, proqramın əsas məqsədi əhalidə sağlam həyat tərzinin formalaşdırılması, uşaq və gənclərin idmana cəlbinin kütləvi xararkter almasının təmin edilməsi və idmanın müxtəlif növlərinin inkişafına şəraitin yaradılmasıdır.

          Sonra kollecin informatika müəllimi Cəmilə Nəsirova Naxçıvan Muxtar Respublikası Ali Məclisi Sədrinin “2019-2022-ci illərdə Naxçıvan Muxtar Respublikasında rəqəmsal ödəniş xidmətlərinin tətbiqinin və nağdsız hesablaşmaların genişləndirilməsi üzrə Proqram”ın təsdiq edilməsi haqqında 09 avqust 2019-cu il tarixli müvafiq saylı Sərəncamı haqqında tələbələrə ətraflı məlumat vermişdir. O, slaytlar vasitəsi ilə çıxışında bildirmişdir ki, qeyd olunan Sərəncam muxtar respublikada nağdsız ödəniş infrastrukturunun yaradılması, əməliyyatların həcminin artırılması, institusional mühit yaradılması və rəqəmsal ödəniş xidmətlərindən istifadənin daha da genişləndirilməsi məqsədi daşıyır.  O, qeyd etmişdir ki, muxtar respublikada 2014-cü ildən Mərkəzi Bankla Vergilər Nazirliyi tərəfindən hər 6 ayda bir dəfə “Nağdsız ödəyin, hədiyyə qazanın!” adlı həvəsləndirici tədbir keçirilir. Ümumilikdə keçirilmiş 11 tirajda 2577 vətəndaşa 165 min manat dəyərində müxtəlif hədiyyələr təqdim edilmişdir.

   Görüş diskussiya şəraitində davam etdirilmiş və tələbələrin sualları cavablandırılmışdır.

Mütaliə günü

09 aprel 2021-ci il tarixdə Naxçıvan Tibb Kollecində M.S.Ordubadi adına Naxçıvan Muxtar Respublika Kitabxansı tərəfindən “Mütaliə günü” ilə əlaqədar “Mütaliə mədəniyyətinin inkişafı cəmiyyətin intellektual səviyyəsinin yüksəldilməsinə xidmət edir” adlı tədbir keçirilmişdir. 

Tədbirdə Naxçıvan Tibb Kollecinin direktoru Sona Məmmədova qonaqları salamlamış və çıxışında bildirişdir ki, mütaliə insanların mənəvi həyatının formalaşmasına, hərtərəfli inkişafına dərin təsir edir. Oxunan mətnin növündən, janr və mövzusundan asılı olmayaraq, mütaliə insanın həyatında mədəniyyətə yiyələnmənin ən mühüm vasitəsi kimi çıxış edir. Mütaliə bilik əldə etmənin, elmə yiyələnmənin, elmin zirvəsinə yüksəlmənin ən mühüm vasitəsi olduğu kimi, həm də tərbiyə prosesinin tərkib hissəsidir.

Qeyd edilmişdir ki, tarixi keçmişimiz bu günlə sıx bağlı olduğu kimi, bu gün də gələcəklə sıx bağlıdır. Kitab bəşər həyatında qalacaq miras, inkişaf etdirən və ziyalandıran ünsürdür. Kitab elm və mərifət dünyasına açılan qapıdır. Mütaliə insanı kamilləşdirir, onun nitq qabiliyyətini inkişaf etdirir, insanı bəd əməllərdən saxlayır və onu yaxın-uzaq keçmişlərə aparır. Kimi həmin kitablardakı qəhrəmanların müsbət keyfiyyətlərini mənimsəyərək, kimi də oradan öyrəndiklərini həyatda tətbiq edərək yaşayışını qurur. Yaxşı kitab aqil insanın həyatına həmişə işıq salan, onu tərbiyələndirən ən mühüm vasitə olub.

M.S.Ordubadi adına Naxçıvan Muxtar Respublika Kitabxanası  direktoru Tamella Əsgərova tədbiri giriş sözü ilə açaraq bildirmişdir ki, belə tədbirlərin keçirilməsinin məqsədi oxuculara yüksək səviyyədə xidmət etmək, cəmiyyətin informasiyaya olan marağını  təmin etmək, insanlarda mütaliə mədəniyyətinin formalaşdırılmasını istiqamətləndirmək, kitaba olan marağı artırmaq üçün kitabxanaçaların işinin istiqamətləndirilməsi, iş təcrübəsini bölüşməsidir.

Sonra  M.S.Ordubadi adına Naxçıvan Muxtar Respublika kitabxanasının elektron zal müdiri Zeynab Sadıqova “İntellketual səviyyənin yüksəlməsində mütaliənin rolu”,  həmin kitabxananın kitabxanaçısı Rəsmiyyə Yusifova “Kitab oxumaq bizə nə verir?” adlı mövzularla çıxış etmişlər. Çıxışlarda  bildirilmişdir ki, mütaliə müasir dövrün və tarixi keçmişin hadisələri ilə yaxından tanış olmağa, ictimai münasibətləri dərk etməyə, həyatda obyektiv baxışın formalaşmasına, eləcə də cəmiyyətin həyat tərzi üçün xarakterik olan etik, hüquqi və estetik normaların mənimsənilməsinə kömək edir. İnsan zəkasının inkişafında müstəsna rol oynayan mütaliə eyni zamanda onun mənəvi inkişafı, digər insanlarla münasibəti, gündəlik hadisələrə baxış tərzi, qərarların verilməsi və.s  məsələlərdə də mühüm rol oynayan əsas amillərdən biridir. Kitab insanın ən yaxın dostudur. O cəmiyyət həyatının bütün sahələrinin inkişafını tənzimləyən  ümdə vasitə, insanın həyat yoluna işıq saçan bir bələdçidir.

Futbol

      Bu gün muxtar respublikada cəmiyyətin inkişaf edən bütün sahələri kimi idman da  öz çiçəklənmə dövrünü yaşayır. Muxtar respublikada yaradılan müasir idman infrastrukturu, inşa edilən obyektlər dünya standartlarına uyğunlaşdırılır. Turizm infrastrukturunun yaradılması dövlətin bu sahənin inkişafına xüsusi diqqət və qayğısının göstəricisidir.  

      Uşaqlar və gənclər arasında bədən tərbiyəsi və idmanın inkişaf sisteminin formalaşdırılması, təkmilləşdirilməsi, məktəbəqədər yaşlı uşaqların, ümumtəhsil məktəbi şagirdlərinin və tələbələrin fiziki tərbiyə sisteminin inkişaf etdirilməsi, yaşayış yerlərində bədən tərbiyəsi və idman işinin təşkili, əhalinin bədən tərbiyəsi, sağlamlıq və idmanyönümlü məşğələlərə cəlb olunması və digər məsələlər bu sahədə muxtar respublika rəhbərliyinin qarşıya qoyduğu əsas məqsədlərdəndir. Bu gün muxtar respublikada gənc nəslin fiziki və mənəvi cəhətdən sağlam böyüməsi, vətənpərvərlik ruhunda yetişməsi muxtar respublika rəhbərliyinin əsas prioritetlərindəndir. Təbii ki, bu istiqamətdə idmanın rolu danılmazdır. İnsanların asudə vaxtının səmərəli təşkili, uşaq və gənclərin sağlam ruhda tərbiyə almaları üçün hər cür şərait yaradılıb. İdman və bədən tərbiyəsinin kütləviləşməsində klubların, idman məktəblərinin rolunu xüsusi qeyd etmək lazımdır.

      Belə ki, Naxçıvan Muxtar Respublikası Ali Məclisi Sədrinin “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramıˮnın təsdiq edilməsi haqqında 14 fevral 2020-ci il tarixli 459-05/S saylı Sərəncamında verilmiş tapşırıqların icrası ilə əlaqədar Naxçıvan Tibb Kolleci tərəfindən İdman klubu və 2021-ci ildə görüləcək işlərə dair Tədbirlər Planı hazırlanmışdır.  Bu Tədbirlər Planına əsasən qeyd olunan İdman klubunun oğlanlardan ibarət Futbol komandası  06.04.2021-ci il tarixdə mini-futbol oyunu keçirmişdir.

Bizi sosial şəbəkələrdə izləyin